又到聖誕

又到聖誕, 今年公司頭獎又冇我份,爬地個日仲撞鬼以為唔見咗公司上網嘅密碼,想BBQ但驚天氣唔好改去烚吓烚吓,仲有.....

依舊在家work at home 囉, 又係好冇新意咁渡過

哼. 今日先黎病

我病呀今日. 請咗病假, 瞓咗成日. 係d安眠(感冒)藥未發作之際寫吓Blog. 今日先黎病. 攪到我冇得去機場酒店飲飲食食, 我嬲呀 ! 咳到甩肺, 個鼻又塞住厠紙. 點見人呀, 我嬲呀, 嬲!

囍

病到懵懵地, 差D唔記得恭喜一舊雲新婚之喜. 雖然好病, 食咩都冇味, 但係星期六點都去咗雲小姐嘅婚宴支持下.

老土果句: 祝佢地白頭偕老, 永結同心 !

小器

細個聽母親大人講過BB仔好小器, 千祈唔好讚佢身體好,通常一讚完好快會病比你睇. 估唔到呢樣野居然發生係一把年幾嘅我身上.

早幾日見瑪莉姐病咗兩個星期都未好得晒. 格衰衰的我發口痕笑佢冇鬼用, 又話自己好叻女呢年好少病. 第二日係公司就覺自己開始作病喇.....本人工作地點隔壁有個由兩位美女組成嘅流感疫區, 家中又有瑪莉姐. 呢次仲唔輪到我衰咗 , 簡直集合各家之大成:~~ 鼻塞, 鼻水失控, 喉嚨痛, 咳, 發燒, 頭痛... 家陣個鼻聞唔到味, 食咩野個味道又一樣. 哭~~~~

都好, 由於食咩都一樣, 今日順應母親大人飲咗碗生平至憎嘅魚湯, 比佢讚我乖. 呵呵~

無聊電話

地點: 屋企

時間: 晚上十點

人物: 母親大人 和 我

背景: 正跟母親大人搶電視遙控器 (我要睇阿幹探, 佢要睇英文台)

鈴鈴~~鈴鈴~~手機聲響起

冇來電顯示,心知不妙~~~

我: 喂~~

心急人: 我係心急人

我心諗除咗你仲有邊個呀

我: 有咩野事呢?

心急人: 我地發現咗個mistake! 大家一直都冇留意......

~~死,係唔係好大件事,要即時call 我 ??

我口窒: 咩野mistake呀?

心急人: 有單sales book 錯部門, 你根據咩野文件book.....下刪n條問題

我 (超....) : 簡單解答咗佢嘅問題之後.....哦, 咁要點呀?

心急人自言自語後..........

心急人: 咁我係呢度改番條數啦

我: 哦, 好呀!

可能我潛意識想收線嘅念力太強,引致此時信號突然接收不良,聽到心急人喂咗幾聲之後就自動cut線.

我又繼續同阿媽搶電視睇........

西安五天行 (二)

Day 3: 去咗間佛寺睇文物,由於間間都差唔多樣, 我已經唔記得咗叫咩名. 當日返到西安城, 同班老外遊客玩咗個入城歡迎儀式. 工作人員打扮成唐代人, 歡迎我地班友仔. 我地就覺好娘, 但班老外就睇得好開心. 當日最大發現就係終於聽到阿自閉領隊講野,我從見個咁靜同唔出聲嘅人,好想問佢係唔係後悔自己入錯行..


Day 4: 上華山. 第一個反應就係~華山論劍~. 一行人先由山腳坐纜車至山腰,都經已好高吓, 行咗一段小路,睇吓風景就去到1,600米高嘅山. 果度咩都冇, 只有一個刻有"華山論劍-金庸題"嘅大石碑. 當地導遊提議我地幾個年青人向難度挑戰,再繼續向上行. 身為年青人嘅我當然一口答應,點知瑪莉姐突然扮老,驚行到半路會死得喎. 係我恐嚇之下至肯死死地出發, 當日花了2小時行畢全程, 共走過超過成千級樓梯,相等於我一年嘅總和. 值嘅,風景真係好靚, 好有靈氣.

PS: 原來華山係冇劍賣,木劍仔就有幾把.... TATA我幫你唔到喇.


Day 5: 又睇古蹟, 買手信 (唔好食,買唔到野. 呢次冇手信呀) 下午回港,未到香港已經打量下次行程. 咁就完咗個假期, 唔想返工呀我~~~~~~~

西安五天行 (一)

係. 冇講錯! 由於成唔到團,家姐又改唔到期, 攪到原本去韓國,變咗去西安. 唉! 又一次跟韓國無緣. H.O.T~你等我, 我會去買你地d 演唱會DVD返黎!

點都講吓個行程:

Day 1: 由於集合時間係朝早6:25. 通宵睇咗部卡通"恐怖寵物店"嘅我是日好似死屍一樣,跟阿導遊先生行黎行去. 當日景點係 唐僧住過嘅大慈恩寺, 餃子宴 (凍嘅, 服務員又冇禮貌),好在當晚有得食烚烚吓. 晚上去咗仿唐主題公園睇咗個超悶嘅水幕電影. 10點幾返到酒店, 三條懵婆無無聊聊走去唱K唱到半夜1點. 當晚中學時代聽歌都可以係度搵番黎唱.

Day 2: 同樣唔夠瞓嘅我,去咗睇半坡遺址,即原始人嘅部落,原來起初中國係女系社會,男人冇地位架,之後就去咗驪山,即秦始皇安葬地, 真係好有氣勢, 只係諗到"人傑地靈"呢幾個字. 去到兵馬俑, 好勁喎. 好多老外都去睇. 相信阿秦始皇當年真係一條癲佬黎, 要死咁多人黎起個墓,折墮死啦, 睇下佢自己同兩個仔嘅下埸! 如果佢唔係咁,中國就唔會有咁大喎, 唉.

給C小姐的信

親愛的C小姐:

今日係妳浮游於太平洋最後一日, 實在令人高興. 因妳從此甩難,唔使成日對住d蘇州屎和心急人. BUT ...我驚你會悶囉, 冇咗我呢個癩癩地嘅人同你係公司玩死鷄脾, 蕃薯卜.PS:我地係講(8)公事....

放心啦,我唔會掛住妳. 因為我會成日煩住妳. 所以妳唔好掛住我喎. 返工第一時間加死鷄脾,蕃薯卜和MSN呀. 有野玩實預埋妳. 嘻嘻

此致

I 小姐上

中秋節翌日

今日一如以往,懶得就懶. 一早放咗個姪仔飛機, 因唔想放假都走去上水行街. 唔想郁, 但係屋企又冇野好做,我又學人扮乖去執屋. 點知愈執愈唔對路,鬼死咁多野要執, 開咗個頭點都要攪番掂佢, 就係咁用咗一個下午. 家陣又回復到無聊當中, 冇野做為有寫吓Blog.

噢屎! 無聊中 ~~zzzz~~.......

唔好嘈

呢排有好多人都叫我唔好嘈. 係屋企家姐成日叫我"唔好嘈" 係公司,tata又叫我"唔好嘈" 咩我好嘈咩? 我咁文靜, 嘈極有限啦.. 我唔嘈我唔嘈.....乘100次唔該.

上回提要

好耐冇報告工作情況比大家知.

上回提要, 自本人發表咗份"太平洋使用說明書ver.2.0"比個新人之後. 基於本人文采出衆, 描述細膩. 句句都繪影繪聲, 所以未實際開始做, 阿新人已經屈服於我嘅筆風之下- 返咗一日就請辭喇 . 有上次係個井請人經驗, 呢次冇即日出announcement, 唔係就真係娘爆. 家陣黎咗舊雲, 因為係一舊雲嘅關係, 對我嘅筆風自動開啟免疫能力, 難得佢對肯走入太平洋呢個死水之中,本人當然會盡量配合.

個井呢, 係八號風球當日,比C小姐搵到高比仔. 免除我不少煩惱, 終於唔使個個星期碌上個井度, 另一方面開始發現有代溝, 同佢講NBA, 我停留在Michael Jordon年代,佢就只識Kobe Bryant. 我啋!

呢間公司點會對我咁好, "兩波"剛平, 另一問題又起, C小姐唔做, 同阿咖喱哥一定溝通唔到,未上任就開始影響到我. 頂! 又要我搬位, 今年第三次, 我係閒人甲,郁我都係正確, 算數! 橫掂我都坐得唔耐. 嘻嘻....

秋季大旅行

本人訂於本年十月十三日至廿一日為秋季大旅行, 十三至十七日去韓國, 之後行程待定. 呵呵呵!!

真係未出發,先興奮..

此致

晒命的人上

大件事

早排死好彩, 係股票場上呃咗d錢番黎. 所以本人突然良心發現, 諗住回饋屋企. 居然走去換咗廳部冷氣機,等阿媽唔使交咁多電費 . 又突然申請咗張附屬咭比阿媽,變相加佢人工. 呢兩件事對屋企人黎講簡直不可思議, 十年唔逢一閏, 大新聞喎. 好豪喎,轉死性...下刪n句comment.

佢地咁睇我冇法, 貪錢係我自細嘅嗜好, 大個咗嘅人生方向. 冇咗佢簡直令我嘅生活變得暗淡乏味, 也是我不斷轉工嘅原動力. 做好事梗係物以罕為貴, 間唔中做吓, 佢地先會感動. 哈哈 (查實係縮骨)不過做完好事之後呢....

部冷氣機用咗一個月後滴水,比樓下投訴. 母親大人因此情緒激動, 開始埋怨我要換機和安裝時又唔睇緊D (喂, 我睇黎做咩, 我又唔識安裝) 家陣令佢好煩惱.... 煩咩,又唔係要自己拆部機出黎. 係不斷煩擾下令我心情煩躁, 死火! 一早起身又得罪阿媽..

個張信用簡直捉蟲,有次出街食飯母親大人用咗黎找數,事後居然叫父親大人比番錢佢. 張咭係我比錢喎!! 咁又唔見幾舊水.

下次做好事之前真係要諗諗先喇.

變

最近好想變, 可能太悶和攰, 諗住想改變吓自己. 基於"畢直"有限, 冇錢搬, 要向細微埋手, 由幾個月開始,已經不斷買衣服,務求今季著新野,銀包手錶都要新. 個頭呢,剛剛轉咗個髮型, 好想變, 唔知下次變咩野..

五碗水煲埋一碗

呢排唔聽話,要戒口嘅食物全部都食. 可能忍得太耐攪到心理不平衡, 什麼水煮牛肉, 辣味牛百葉,辣味魷魚,何包蛋.....通通都食,話知佢....

開心過後就係痛苦嘅開始, 不枉我係屋企公認嘅"大食懶", 食完又唔郁. 咁食法不但止體重上升, 連條腸都跟我偷懶,成個星期都冇郁過. 唔想睇西醫, 咪走去睇吓中醫, 冇咁傷身. 阿醫師開個藥方, 叫我當晚五碗水煲埋一碗, 加重藥, 兩小時內包掂. 可能阿媽對一碗水嘅定義唔同, 竟然用食公仔面嘅湯碗為單位.... 當晚飲完果一大碗藥都飽啦. 我一路飲,一路埋怨之際,又比阿媽話我好蝦佢,(佢蝦我就真,要我吞一大湯碗嘅臭水) 可能d藥溝稀咗, 8點飲完, 等到清晨2點都冇反應. 諗住算,去瞓啦. 點知原來藥力延至清晨4點先發作... 痛痛痛醒咗!! 啋,攪到我冇覺好瞓. 仲係連續兩晚, 鬧鐘都冇咁準呀!

平靜

早排一到埋數日子, 心情就開始沉重. 一怕太平洋盤數有咩錯漏, 二怕f小姐唔知又比咩野屎過我執, 更怕又成為三連慢--即最遲交數果兩家公司(佢地係連續兩個月嘅紀錄保持者). 至怕一條友三更半夜係公司同堆垃圾數字死過.

呢家呢,走ed,走ing 和 will走都發生, 一切都在預料之中. 心境反而十分平靜, 都預咗要DIY.心裡有數. 死啦,我咁後生就睇化晒啦, 冇再為呢d細小事動氣煩惱. "隨遇而安"呢句話真好.

其實比起之前份工, 呢d根本沒什麼大不了, 只係係太平洋浮游得耐,過慣幸福日子, 現在要返回舊時有d唔慣啫.

時間依舊流逝, 埋數依舊要做. 咁又點, 有糧出就得喇. 計埋自己果份, 家陣一個頂三個, 出多兩份糧比我就好..........發夢ing......

碌呀碌...碌呀碌...

多得F小姐俾面, 攪到我個個星期都碌上個井度. 家陣咁熱, 加上office 個空調唔夠涼. 都幾惡頂. 好在最近都有公司車接送, 輕鬆好多. 仲有C小姐同我去, 更加好啦. 呢輪F小姐鬼死咁積極進取, 好偉大咁話寧願放棄份新工, 主動要求留耐d,直至完成個月結為止......嘩! 嘩!嘩!!! 好鬼有責任感喎. 平日埋數又唔見有咁嘅思想. 自問對佢一般, 冇理由對我咁好. 有D驚喎, 唔係想我留佢吓fa, 攪到連心急人都叫我不如比時間佢. 我唔想再次打破太平洋紀錄喎.

所以明天又碌上去in人,希望有所收穫. 好在今日請咗香港個post,煩少樣. 等我更新吓我果份令麗莎嘔心嘅著作: "太平洋會計說明書及使用者手冊. ver.2.0". 內容屬實, 希望唔好嚇親阿翠翠啦. 各位如有興趣, 歡迎租看. 嘻嘻!

噢! "屎"

幾經波折,以為終於搵到個似樣嘅會計, 以為一切都終於苦盡甘來. 以為唔使個個月好似教女咁教, 以為唔使個個星期碌上個井度. 以為上星期四同個新人一起返工,見證交接, 以為可鬆一口氣....點知

個新人做咗3 日, 就經已頂唔住, 又話同人唔夾, 好似受到好多委屈咁, 十成受到教唆啦. 我今早一返黎就經已收到佢嘅請辭. 我啋! 上星五我仲出咗個announcement 公告天下. 真係比佢激死, 真係好想知星期五,六發生咩野事. 攪到佢咁心淡.

好啦, 開心嘅日子過得特別快, 發完白日夢. 一切還完基本步.又要睇履歷表, 又要碌上去in人, 又要趕頭趕命,又要玩埋數DIY...

又話自己嘅物件無故折斷係幫我避刧嘅, 呢排我嘅耳環, 鏈咀, 手鏈都經已相繼折斷咗. 下次仲想壞咩呢? 壞夠未呢?

Interview 趣事數則

呢幾個月因工作方面, 經常要見應徵者. 雖然浪費咗唔少時間, 但係In-人期間都可以學到好多野.

除咗早前提過見人時, 撞到大強,引致本人失控之外, 仲有以下見聞:

大陸篇:

為免犯同樣錯誤, 呢次自備考試題目, 睇吓佢地識唔識, 結果呢:

1. 衰英文:某女子自稱英語良好,當我比佢睇英文 "exchange gain"叫佢解果時, 佢居然話叫做存貨成本... 無語中...... 問十題, 錯十題.... 枉我咁早碌上個井, 拜拜啦!

2. 衰自大:另一女子, 英語"閱讀"ok, 問題全中. 不過衰自大, 驚死人唔知佢好掂. 咩都話好易喎. 另外佢居然拎做緊果間公司個P&L 我睇. 嘩! 阿姐. 知唔知咩野叫confidential, 呢d野點可以隨便比人睇. 仲有識解英文account唔代表識講英文. 佢經常用D半桶水英文單字同我講野. 聽到耳都則埋. 聽過"楊修之死"未? 叻到咁都係死路一條, 更何況呢位阿姐唔係.

3.衰發呆:有年青女子見工. 點解真人同張相好唔同? 原來係五年前影嘅.... 都算. 雖然我咁正經講野係悶咗少少, 但都比吓面留心吓啦. 我一路講, 佢對眼就週圍遊, 唉! 再見啦.

香港篇:

1. 衰撻朶: 某女子係遲我兩年畢業嘅師妹, 佢知道之後係咁問我知唔知阿邊個邊個老師點? 連畢業禮都冇去嘅我鬼知咩,唔使扮熟喎. 知佢係蘇記畢業, 對佢嘅國語水平自不然有所期望. 點知仲差過一般人. 唉, 同夏老師熟有咩用, 老師知道實激死佢. 我都係阿夏老師教出黎, 阿師妹話你身體唔好, 係唔係比佢激親呀?

轉吓個樣

為咗迎合夏天, 轉吓個Blog 樣, 呢個look 得唔得?

殺魚犯

最近因諸事不順, 無心情日日睇吓之前死剩果三條魚公, 早幾日突然發現唔見咗兩條魚. 心諗唔通又發生家居意外, 唔通兩條魚公, 會唔會係"基"民, 但怕周遭白眼, 走上殉情之路?

好邪, 見唔到條屍, 剩得病魚一條同一d魚鱗..... 由於現場環境恐怖, 為免引起觀眾情緒不安, 唔post出黎啦.

冇心機, 更加唔想殘害生靈, 決定短期之內唔養魚, 等我又放自己長假先啦.

我啋! 好邪事件之事業篇

數日前同親愛的朋友葉阿蜜玩MSN, 突然發覺我歷任老細都係A字頭, 簡寫都係叫A.C.

1. 阿曼度.鍾 -個款似黑道老大多過似會計師.

2.安德魯.陳-此人喜怒無常,E.Q之低, 實屬極品.

3. 艾力士. 陳-算正常,冇咩野. 佢最唔好嘅就請咗個成日比說話我聽嘅"鴨屎"

4. 愛力臣. 陳-現任老細, 工作認真, 所以我地好多野做

點解我同叫AC嘅人咁有緣嘅, 好邪呀!

"不知道" "沒辦法" 大晒咩....

又到死期日, 都預咗F小姐交唔到數, 如果起碼好似上個月咁平到盤數, 我都可以執番個似樣嘅出去. 唔知係唔係臨別秋波, 想比份"大禮"我. 佢比我個pat屎仲衰過之前2個月. 嚴重懷疑佢有冇學過會計, 知唔知咩野叫double entries ! 一 Dr. 一Cr 嘅數, 我讀中四個陣都已經曉做啦. 身為財務主管, 居然同我講唔知點解會咁, d數唔平, 我都冇辦法! 我真係頂佢XX. 下刪十四個字粗口...... (跟我老豆學) 以下係同F小姐嘅對話:

F (扮無辜): 不知道為什麼會這樣, 其實很簡單, 但還是做不到...

我 (d火正在蘊釀中): 你連報表中的formula都是錯的, 當然不平!

F (扮死狗): 我見到都怕了, 從來沒有做這麼難的工作....

我 (火起) 崩潰大叫: 你不知道? 你怕什麼? 我次次都有教你要怎麼做, 你有沒有做? 跟你講過哪個數字有問題, 你有去看, 去查嗎? (心諗:@#%$$#)

F小姐, 無語當中...

我 (更加火大): 最重要的工作又不花時間做, 你叫我怎樣幫你! 你明白我當初想加長你試用期的意思嗎? (@#$%)

F(懶偉大) : 所以我選擇辭職, 不想拖累你..

我 (心諗: 多謝晒喎, 你唔早講,呢三個月你都累我冇咗好多日嘅假期同的士錢, 換成錢, 請多一個你個位都得)

我: 給你30分鐘時間, 把問題找出來. (因我比人迫遷, 成十點幾, 仲未開始執野)

F: 要是找不到, 我都"不知道," "沒辦法"

(呢句話好熟, 係屈銀紙果陣時都聽Y小姐講過)

又擾攘到到成十一點幾, 到最後呢位阿姐都係果句"不知道", "沒辦法". 得! 咁去死啦! 收工!

星期六原本有朋友請食生日飯,要取消. 又work at home! 又等個死婆比番d adjustments我. 家陣成4點, 仲未比到我. 唔係要我星期日都work at home 吓.

如果同多姐講"不知道", 沒辦法... 唔知會點呢, 可能賠多一個月糧叫我走. 都好喎... 好想放長假...

慶回鷄, 發覺老了十歲! -工作篇

呢幾日去到邊都會見到各式各樣慶祝回歸偉大祖國嘅廣告和節目.. 好鬼煩! 呢日只係提醒我原來出黎工作已有十年. 唉! 又學人做吓呢十年回顧先:

1997.6.30 : 睇住肥彭好唔捨得離開, 我都好唔捨佢一家人, 特別係佢個三位千金(生得咁靚, 都唔似佢) 同佢隻狗仔-威士忌, 仲有告別學生時代嘅日子......

1997.7.2: 正式返工, 係一間蚊型"痾突"firm做,由 會計 audit, Tax computation, 一手攪掂. 咁都好嘅, 咩都識d囉. 咁就做咗三年.. 其間經歷金融風暴,老細以此借口炒人,仲講到有幾唔捨得d舊人. 哼! 咁唔掂仲可以轉頭買"波子"揸. 不過唔關我事,炒人冇我份, 不過佢炒咗我個friend,都冇心機做喇. 都好, 走個年比我係annual dinner 抽到大獎. 金牌鏈咀一個,成二千銀.

2000.9.1: 對做auditor冇咩興趣, 轉咗去間清潔公司做accountant, 人工好過舊時,不過鬼死咁悶. 日日返工一邊聽收音機,一邊等放工. 都冇野做,係間中幫老細譯吓英文合約做中文.. 我都係查字典啫,d清潔terms咁深,鬼知佢講咩喎. 好在d老細, 皇親國戚都對我好好.但實在太悶, 都係要閃.

2001.3.9: 我呢個賤骨頭,去咗間鬼死咁多野做嘅所謂大公司, 日做夜做, 期間經歷老懵懂時代,攪到經濟差, 再加上沙士, 又走唔到,谷住捱咗三年幾... 但係真係學到好多野. 人工又好過上一份.

2004.8月:去咗間連所寵物店做, 人工又好dd, 又係做餐你死,個"鴨屎"又成日比說話我聽, 下面三個細嘅又以為我係"膠層", 唔敢同我食飯吹水. 睇我咁善良, 都唔知驚咩. 結果悶到頂唔順, 又閃.

2004.11月: 係間US. listed Co.做part time accountant, 其實佢想利用我迫走原來嘅人. 雖然期間個位阿姐成日講流料比我知, 但我都冇諗過要坐佢個位, 我一早表明立場對呢度冇興趣. 雖然人工好, part time都比bonus我, 仲要比美金! 不過返5日半, 唔想. 期間我仲幫佢執好d舊屎,做晒adjustments. 點知臨走都比佢"洗", 唔好以為我唔識還拖, 臨走我都送份"大禮"比佢, 睇怕佢有排煩. 因我攪到佢係所有"膠層"心中, 原本花花地嘅record, 花晒囉! 哼! 我唔想,係佢迫我嘅.

2005.3月:去到太平洋休養生息咗年幾, 期間都學曉會計以外嘅野又同人夾得到 (因大家都癲癲地)

2007.7.1: 依舊浮游於太平洋中, 工作多咗,煩惱又多咗. 回鷄假期都要拎返屋企做. 好似舊時咁.

十年工作回顧完畢! 慶幸次次轉工, 人工都有加冇減, 講完. 多謝收睇!

嘩! 點解個位愈搬愈衰!

今日接到通知, 又要搬位. 個位坐咗三個月都冇喎! 只係為咗某人行少兩步路,咁就要搬. 好鬼無聊.. 係冇得選擇下要搬去乳牛個位. 唔知仲有冇d鷄骨,豬骨係樹呢?



死, 諗得太多,突然有想嘔嘅感覺. 想知此乳牛嘅偉績, 可去以下look look:



http://cheribella.blogspot.com/2006_10_01_archive.html (乳牛的故事)

http://cheribella.blogspot.com/2006_11_01_archive.html (再頌乳牛)

借此向原創人致意, 實在寫得太好, 笑死人冇命賠.

生日快樂....

由細到大都好鐘意係生日當天同屋企人過, 因為呢種日子一年比一年少, 今日唔知聽日事, 想珍惜吓. 不過時常都比某衰婆打破我嘅計劃. 原因仲年年不同:

事例一. 佢有朋友B跟我同一天生日, 某衰婆寧願跟朋友過, 又或者同朋友去旅行, 都唔理我. ~~喂! 我先至同你同一個阿媽生呀!!

事例二. 今年呢, 唔使陪朋友喇, 阿媽早已不斷提醒大家當日要食飯,就算個孫女要考試都要到. 但某衰婆居然唔記得,好心check 吓個腦, 可能生錯地方. 仲為咁攪到係生日前一晚比阿媽抱怨, 激得我同阿媽吵大交. 喂! 冇腦果個又唔係我, 仲咩鬼話我喎! 枉我當個衰婆係外地逍遙快活嘅時候, 我就出去幫佢搵資料, 晚間online又搵, 攪到我連H.O.T嘅website都冇時間睇. 你個死婆, 你知我不嬲都小器, 我嬲呀!!!

好在當晚大家都食得好開心 (我阿媽經我長期訓練,好快嬲完,仲叫我唔好理個衰婆),攪到我又忍唔住又食咗幾件燒鴨& 龍蝦, 結果返到屋企又周身痕囉:

仲有我姪女玩野之作:

咩野咁urgent 呀!

原來係隻豬, 係喎, 真係好urgent! 擺床頭會旺喎!

外表係豬, 查實係個盒, 好喎!

總結: 今年生日好快樂, 皆因我有好好嘅家人,好朋友,好同事同我一起過. 都唔覺自己老了一歲 (好肉麻, 早抖先, 明早又碌上個井度. 唉...)

死期快咗!

月尾又係埋數嘅時候, 心情又開始沉重. 又怕比人問咁遲交數. 喂! 你估我想咩. 做唔起我都冇法, 盤數又唔係我做. 回想往時, 可以七點半就閃, 多野就8 ,9 點, 好懷念舊時呀.

早排終於解決咗F小姐, 不過又引出另一問題: 仲未請到人. 皆因個井位置偏僻但十分聞名, 有名在搶劫,殺人咩都有, 有料嘅人都唔肯去做啦. 所以tata & C小姐唔准我一個人去個井度. 放心我一定唔會自己跳井找屎.

係冇得選擇下, 搵到個得得地嘅. 見個陣咩條件都話冇問題, 比咗offer後佢先至話又要諗諗. 頂! 浪費我嘅時間.. &^%#. 睇黎佢都係唔願做, 又要搵過....又要碌上去..... 又要考佢英文同考我嘅国語.

原本6月份嘅埋數死期係第五天, 地震後得三日時間. 即係當大家享受回鷄假期嘅時候, 我同C小姐又要work at home 囉!

"激"瘦之謎?? 後續

仲有個方法都可以再瘦d, 就係去多d大陸個井, 光是轉車都攪到筋疲力竭:

一大早由屋企坐巴士到火車站坐火車到羅湖, 做好過關手續後, 再搭琛圳地鐡到科學館站. 然後碌上去趕搭機場大巴到琛圳機場, 最後先至等公司車接去個井度. 順利嘅話, 係2個多鍾到搭五程車扺達! 記住全程都拎住部手提電腦走黎走黎去. 又要打醒精神,怕俾人搶野喎.

去到個井都成十一點幾. 冇耐又去食飯, 成日都趕頭趕命. 回程時又同朝早一樣, 又搭五程車返屋企. 順利嘅8點都返到屋企嘅. 個井比琛圳同香港仲熱多兩三度, 使咩焗Sauna減肥. 是日運動量,相信同打2場波差唔多.

實在太累了,令人當晚唔想食飯, 第二日通常又會唔知醒, 攪到要搭的士返工, 蝕晒大本 ... 好在呢次講掂娜姐等我比錢一直坐到羅湖, 可能見我個樣太殘掛, 又要拎埋份legder走, 如果唔係冇9點都返唔到屋企.

"激"瘦之謎??

最近開始有人發覺我瘦咗, 雖然表面上會扮作冇咩特別, 但心中難免會暗自偷笑 , 唔知係好事定壞呢?? 由年頭至今一共冇咗26磅肥肉/水. 原因如下:

1. 貪靚: 因知道要幫手做姊妹, 怕買唔到衫, 開始學人食減肥餐例如小黑妹提供嘅餐單,及西柚餐, 由於定力不足. 斷斷續續咁到最後都係輕咗幾磅. 對於身形龐大嘅我黎講, 梗係冇人發覺啦.

2. 病病病: 由去年起經常失眠, 就算瞓到都會醒幾次. 另自三月開始, 成日要睇醫生, 次次病情不同, 傷風發燒唔在講, 跟住又成日流鼻血,誇張到要入急症室, 最死火嘅係皮膚敏感又發作, 個鼻長期脫皮, 個"面珠登" 以及 眼皮 會變硬, 又紅又痕 之後就脫皮, 仲係不斷循環果隻. 迫使我不得不戒口, 放棄我最愛嘅牛肉, 蛋, 蝦蟹,龍蝦...總之我鐘意食嘅都冇得食. 令我"生冇可食". 咁又瘦多五,六磅.

3. 自備飯盒: 就係咁, 決定帶飯返工. 阿媽怕咗我會唔鍾意d餸, 都會比d"安全" 即我肯食又唔熱氣嘅野. 如潮州魚旦, 魚柳西芹,菲菜之類. 由於太清淡. 反而再瘦多好多磅喎.

4. 因為冇心機食野, 某人提意不如順便減肥, 晚餐唔食澱粉質. 只食餸同飲湯. 咁又再瘦幾磅..

5. 原來最有效係比人激, 朋友方面, 比某位認識成十年嘅所謂朋友激親,令我極之失望, 飯都唔想食;工作方面, 經常俾某某某激到想講粗口咁制. 攪到d問題一浪接一浪, 埋完一次closing, 都會瘦兩三磅.

6. 飲"七 x瘦": 拜山個日見到位親戚細咗成個碼,佢話因為飲咗呢隻喎, 仲介紹我去"萬x" 買黎試下. 雖然比生果日報話過冇效, 但見佢100%天然成份, 即管買黎試吓. 多得生果報, 依家佢長期要做半價, $139有10支. 一日飲一支, 想快就兩支. 試過同人夾份買8盒, "萬x"仲送張$100現金coupon比我. 飲咗個多月, 我覺得有效喎.

雖然家陣都係好肥, 但唔理得咁多, 見塊面好番d, 間中都會食吓我至愛嘅牛肉 & 蝦蟹, 長期冇得食, 我會抑鬱呀!!

端午節

多得阿屈先嘅捨身殉國精神, 令我地有一天假期. 好野! 今日終於唔使拎部手提電腦返屋企喇 (其實係公司個sever 死咗, F小姐send唔野到比我, 幫唔到佢執屎.

都好, 諗住可以瞓耐d. 死火! 可能年紀大咗,瞓唔到咁耐, 今日居然七點幾就醒.... 唉! 平日返工又唔咁早起身喎! 我死唔服氣, 結果係張床度"典來典去", 點都要攪到成十二點幾先肯起身. 無聊!

為咗應節照例食咗半隻椶 (營養師話一隻椶等於六碗飯!) 雖然係咁, 但食唔飽喎,再叮個米粉食, 之後全日就係家姐房度一邊上網,一邊同阿媽吹水. 又重複聽番我細個有幾唔聽話,令佢幾勞氣嘅事跡.... 次次我都話係你地一手做成, 唔關我事喎. 攪到佢都覺得我有道理, 我仲順便叫佢唔好縱d孫, 有板你睇喎~~~ 嘻嘻.

是日無聊事件報告完畢......

又見大強, 我投降

唔知點解由細到大都同D"大強"好有緣, 係屋企次次都係我發現先,跟住我會大叫要求支援(不論任何時份),雖然一打就可以死得,但唔知點解都仲係好驚.

今朝9:30碌到大陸,去丙F小姐, 搵/執屎同順便In 人. F小姐嘅辦事能力,大家有目共睹. 都係比d 9唔搭8嘅野我. 算啦, 下午去間似d樣嘅中菜廳In 人. 原本一直扮到正正經經嘅我, 突然聽到海倫娜大叫"有大強"!!! 基於本能反應, 我立即彈開數尺, 好不容易扮晒正經嘅形象即時盡失....... 不知是否給海小姐洪亮的聲音所傷,我見大強已經反晒肚,奄奄一息. 唔知個位姐姐,會唔會比我嚇親呢?

點知一強還有一強大,係公司厠所,比我見到隻大大強. 睇黎呢位強哥係厠所好食好住, 唔係點會生得咁大隻(比一般人嘅手指公還要大一倍...). 佢見到我一點反應都冇,佢走佢嘅路,當我冇到! 我今次叻咗, 冇大叫同懶鎮定咁走出黎. 攪到全日未去過厠所..水都唔敢飲. 回程又晚, 多得海小姐比咗條蕉我食, 唔係餓死人..

是日總結: 好累, 好驚 同好急.

簽咭

原本諗住星期六約家姐去元朗食心太軟, 點知因為前文提到星期五晚上嘅意外. 一覺醒來已經係下午4:30. 唉,浪費晒d時間. 當晚又提早一個星期慶祝老豆節(其實計錯日期), 個晚直頭有大食大, 因為係我阿媽第一次簽咭. 佢為咗把曼聯傘, $20大家樂coupon&唔知咩鬼野, 比人說服咗申請2張credit card, 仲限要簽幾仟蚊又再有野送喎.. 真係易呃. ;由確認新咭開始,佢已經不斷反覆問我點用. 答咗n次再n次,佢都唔係好明, 仲係好煩惱. 到最後, 我比佢嘅意見係: 要我地在場先可以用.

講番餐飯, 就因為咁,我又扺受不了龍蝦嘅引誘,攪到敏感症又發作. 咁又奉獻咗$350蚊比醫生, 仲比佢暗示我肥,唔使食維他命喎. 哼! 但佢次次都係比呢d 我食喎. 玩野咩!

血的見證

先容許我講幾句@#$#$%$. 好, 可以開始. 自上個月打破係太平洋開O.T嘅紀錄後, 新紀錄又再一次刷新,心情令人振"憤", 冇法子啦. 呢度實在有太多自以為好掂,其實係豬頭丙同不負責任嘅人,有D就日日都好似好多野做, 但到最後都係一事無成.. 攪pat屎出黎比我執手尾. 是日心裡差到極點, 跟身形一樣穩重嘅我, 當然唔會發晒癲係度鬼晒咁嘈. 但我是日黑面程度,相信都同A君不相伯仲.

做做吓入唔到德國server,心情200%惡劣, 好在有pizza &闊絛面食,心情先得已平衡. 就咁攪到成10點又繼續開工,當晚好似教女做功課咁,遂粒數check.(就算我有女,都唔會咁教佢). 放工時間係零晨2:30 (包括30分鐘丙人時間). 返到屋企都3:00. 沖完涼諗住瞓啦,點知又流鼻血! 可能太燥同食咗pizza 掛, 經過一輪撓攘. 母親大人& 家姐終可係5:00瞓喇...

經過呢次教訓, 家姐送咗句明言比我: 1. "做好人冇用,做咗人地唔會理" 2." 唔識做自己份內事嘅人, 冇資格出糧!" 得! 收到!

哀悼肥魚

昔日情景不再....

係我個舊Blog中都有一篇關於我養魚仔嘅發展史, 最近又一條魚女因肚大死咗, 以下係佢嘅遺照:

死ing~~~ 死咗 ~~~

現在只剩下可憐三支公,係度孤獨終老.

遺失記憶

好多人都好似失咗憶.

事例一: 有日傾開,我阿媽居然話我小時候從未試過用拖鞋打我, 雖然有阿哥做人証(佢幫我擋咗一野). 明明請過佢去戲院睇某部戲, 幾個月之後見到Cable TV有得睇,鬼咁開心話好睇, 未睇過喎. 我都有同佢拗過一輪,結果反而話我呃佢.. 比佢激死.

事例二: 某舊同事向我借錢,自己衰心軟借咗比佢, 到我last day 唔撈個日,居然當冇事發生過.. 算啦.雖然比公價高出好多, 就當做結婚人情 & 買個教訓.. 鬼叫自己衰心軟咩. 家陣邊個問都唔借啦.

事例三: F小姐不知是否緊張過度,我已經好似阿媽咁(雖然佢比我大)日提夜提,比晒溫馨提示要點做, 但到最後都可以忘記,攪到我有即刻想走去個井度@#%佢.

老人家可以體諒, 某人根本當我係水魚, 對F小姐, 我只有無奈.. 另有太多事例不能盡錄... 唉!

6 月4號-真係唔好嘅日子

年年6月4日係中國人傷感嘅日子, 今日看到新聞播出一位媽媽,等了18年才可以路祭自己兒子. 突然有d眼濕濕...

2003年6月4日係我和家人傷心嘅日子, 當日清晨時份我老豆突然心臟病發,要call白車到急症室搶救. 醫生當時話佢係心臟衰竭,心臟功能只得2成, 叫我地要有心理準備. 喊到死死下嘅我點聽得入耳, 根本冇人知佢有心臟病,包括他本人在內,原來佢當時糖尿病太高, 攪到個心有事都唔識痛, 好在最後救得番. 但當時正值沙士, 佢又住係深切病房,唔俾探病. 當時諗起就好心痛... 同樣因為呢件事更令我知道另一件事,攪到我難過咗好耐好耐...

今年6月4日係公司大地震嘅日子, 人事變動得太突然,唔識反應. 除了有點不捨之外, 只係預料大家會有更多工作要煩, 唯一安慰就係搬office嘅機會大大降低咗囉.

明年6月4日,但願可平安渡過,可以去到加拿大啦.

搬Blog lu

由於之前的Blog,唔好用, 未正式公怖就決定唔再用喇. 現在搬遷至此. 都係咁講. 歡迎大家有空時多D黎睇一睇本人一些無聊之作. 要讃嘅話歡迎大家留個言. 如要睇回之前的Blog, 可以去呢個link: http://hk.myblog.yahoo.com/irina_yytang/