要變嗎?

成日都想改變自己生活模式, 但一直以黎都係得口個講字.. 好喇! 好喇! 家陣終於有機會去改變, 真的要變嗎? 離開工作6年的太平洋, 離開跟我十分合拍的同事們.... 係呢間前景不明的公司,走似乎係唯一的出路, 睇黎趁後生,是時候改變一下...

Happy Year 2011 ?

嘩! 係我呀!
兩年冇寫Blog,今日係C小姐提議下,出咗呢篇文章,比佢發"牛豆"時用.

過去兩年,依然做緊同一間公司, 做同樣事, 過同樣的生活

不同嘅地方係比之前"他條"好多, 因正身處暴風雨前夕, 可惜我做死懶鬼的日子就快完結.如果仲停留係太平洋,遲下就....

唔可以9:40至到公司,跟住唔做野
唔可以側側膊,唔多覺
唔可以6點正放工
唔可以成日走去上網喇.


如果有呢種荀工,唔該介紹下我

懶

懶, 好懶, 真係好鬼死懶... 明明係年頭講過要努力寫Blog, 十個月後先有心情開返個Blog黎睇下....... 不過


人係應該有自我.... 無謂改啦..........


(點咁多下.... 因為懶囉, 用多d位, 又可以寫少幾隻字喇, 嘻嘻~)

一年又一年

2009喇. 同2008年一樣依然:

打同一間公司嘅工 ~~雖然size細咗好多~~

做同一類型嘅野~~清潔工, 每日返工执屎~~

住同一間屋 ~~因冇錢搬大屋~~

食同一樣冇益野 ~~我愛芝士, pizza,烚吓烚吓 ~~

去同一間馬會買六合彩~~發達未輪到我~~

搵同一個人傾計~~周公先生,佢簡直係我知心友,不論任何時候都掛住佢, 真係冇咗佢唔得

只有身形急速惡化,更勝去年,睇黎又要

睇同一個醫生減減佢~~

~Long Time No See Wor~

各位好久不見, 本人呢排無論工作, 自身,家宅都受到 512大地震般之震撼. 簡直日日新鮮日日"甘", 風迥路轉,黑到無得頂!



係呢幾個月身心俱疲下,依然頂得住的我. 時至今日都仲未攪到我爆血管, 連我都覺得自己好鬼死勁

既然死唔去, 我又重新振作, 繼續寫Blog喇. 多謝支持!

Call me Form Form! Miss Form!

太平洋終於有咗個大方向,就係cut! cut!cut! 同事們相繼被脫離苦海,羨慕ing. 可以有錢去下旅行 (我唔係幸災樂禍) 長痛不如短痛,學習老懵董當年金句: 走,可以好容易,留下的先至最困難! 真係好難捱, 大老細轉咗, 不過茶包依舊係樹, 明知包茶過晒期,飲咗都會嘔(血),仲有得留下來. 咁同舊時有咩分別?

冇喇喇做咗Corporate 會計,又做多咗野, 不過人工冇變. 心急人成日叫我設計新template 比人填. sales, cashflow, consolidated P&L, 仲有畢直嘅表格. 日日係公司set formula. 悶到想死. 我就黎變咗做form 小姐. 等我攪掂晒d表, 咖哩嘅接班人應該就會上場. 又一次印證大圍算命所講, 我係蠟燭,燃燒自己,照亮別人.

黑色仲夏

今年6月,一個字"黑", 未試過咁黑:

黑仔事件有:

<1>月初去咗台灣執屎, 起初話冇野做,結果去足成個星期. 期間做到通宵,見到堆屎直頭冇晒心情

<2>回港當日比我撞正紅雨回程延誤了一個鐘, 到港發現機場對外交通封閉,巴士停駛, 攪到我要坐Airport Express 去 Kowloon station, 再坐巴士返去新界. 比平日用多2個鍾車程. 我頂@#$#@

<3>原本放假考試, 但身心俱疲憊不堪, 根本無法準備. 結果是次一科都冇去考, 精神崩潰, 根本唔似平日嘅我.

<4>發現問題所在, 原來唔記得覆診,加上病情原來有變,攪到近日行為同精神大不如前. 一日24小時,有20個鍾係瞓,仲係攰到唔瞓會死嘅感覺,好驚,因為連瑪莉姐都覺我有病,叫我睇醫生.

<5>工作依舊一潭死水,好悶,不值一提.

相信黑仔事件會陸續有黎......

年年有今日

死啦,又老一歲(雖然個死人樣同實際年齡唔似), 特別鳴謝欣欣預備嘅蛋糕,同埋又寧願同朋友慶祝生日都唔同我一起嘅瑪莉姐(哼,比我屈咗佢兩餐buffet以作賠償 @_@) 某同事祝我年年有今日, 我啋! 我唔想年年都做到死死下喎.

超豪父母節

由於上次母親節玩大咗, 家姐擺咗圍酒席,我就買咗對千幾蚊嘅"其X" 涼鞋比佢老人家去街市 (佢除咗街市同超市之外,只會係屋企超住部電視).

所以今年父親節,家姐又重複以上動作, 可能肥佬(尊稱家父),覺得冇咩新意,成晚都冇咩表情. 食少少就話夠喇. 最開心嘅表情係比我迫佢講我同瑪莉姐邊個聰明伶俐. 起初佢都唔敢表態,但係我不斷追問下,梗係話我聰明又反應快啦, 呵呵! 雖然我已經唔係第一次聽佢咁講,但我都好開心. 瑪莉姐已經想當場殺死我,阿鄧老太仲加多句表示讚同,仲擧例說明. 事實嘅野我都控制唔到佢地架, 瑪莉妳又唔係第一次聽,我只係想大家開心下啫.犧牲下啦妳!

返到屋企,肥佬依然無咩表情,我突然拎咗個大袋出黎比佢,拎出黎原來係一個科咩袋,係上次母親節買鞋加錢換嘅,仲比我拎咗去台灣用過一次, 我點會咁衰,其實係個袋度,放咗兩件nike衫係其中兩格度. 咁玩野,佢梗係笑到眼都朦埋啦.之後仲即刻用,衫又唔比阿媽洗,要自己親自手洗(因我好耐之前都買過比佢,結果比阿媽漂到個"tick" 由藍色變咗白色,正牌變老反)

$2,300 vs $800,瑪莉姐事後檢討話老豆大細超. 但今次唔係大細超嘅問題(雖然不嬲都有), 係以誠意勝出(雖然我用咗10分鐘時間去買)

我死咗返黎

今日係台灣死咗返黎, 係呢個星期做到我得半條人命, 好在呢個臨時會計好唔話得, 佢話點都會幫我攪好佢. 係過去一個星期, 我日日起碼咀咒個2位死婆不下數十次. 唔知有冇效呢?

呢排好黑, 黑到香港今朝黑雨,班機Delay成粒鐘, 返到香港先知封咗路,冇車返屋企, 結果要坐Airport Express 去Kowloon Station, 再轉巴士返屋企. 12:30開始由台灣出發,直至回家為止一共用咗7個半鐘, 點解我咁不幸....

我家陣死咗, 攤咗係張床度冇晒力, 好似就黎死咁, 我臨死嘅遺言係:唔該幫我咀咒台灣個2個8婆~!!

God seems not blessing me!

出征台灣-第一天

星期日半夜12點先至到酒店, 執得野黎,同細T,歌小姐MSN緊嘅時候,我坐的椅子不停在動,都有成10秒,好驚呀! 地震!! 我住17樓喎. 好在冇事,不過第二日問番tata, 佢唔覺喎! 我唔理,當佢當時瞓咗,至feel唔到地震啫. 之後睇得果半頁past paper就頂唔順瞓咗,當時係清晨4:30.

出征第一天,T小姐極不合作,雖然剛搬公司,但都應該知道自己台電腦擺係邊掛. 問極都話唔知, 好呀,佢部機是交接中最重要嘅野事. 我只好同呢位阿姐講如果搵唔到, 你地/全部人想出糧會有難度喎. 個衰婆先開始去搵,好在有另一位咖哩哥好心幫我搵出黎.電腦login password 又比接棒人估到,掂! 不過佢到最後都有同接棒人做交接.仲對我微笑,假成咁,唔使啦. 事關佢條友膽敢跟tata對駡,衰婆C加入戰團. 結果要由大衛兄調停,不過都係tata勝出.

M小姐係算最唔話得,不但只把所有野交代清楚,仲自動講電腦密碼. 又好在負責接棒人屬經驗豐富之人.衰婆C全日又係人家老板娘面前好努力咁協助交接. 不過唔好意思,比我唔覺意咁同人家老板娘講佢地連4月數都係啱啱做出黎,令老板娘十分驚訝佢地嘅所作所為. 呵呵~~ 衰婆C嘅屎橋衰咗一大半lu.

原來有好多手尾要幫接棒人跟進,睇黎我呢個星期要係台灣過, 又話冇咩野要做我先至黎,結果今日企咗成日,好鬼死多野煩.返到黎又要回email. 家陣清晨4點幾又瞓唔到, 等我又開始讀下書,咁應該好快瞓到.

又衰咗

又衰心太軟, 比tata, 心急人輪流發言, 心急人連家事都出埋, 講到大家有幾慘. (我夠慘啦) 其實某程度上係佢一手做成. 家嫂係衰, 但佢有冇反省點解人地對你咁差呢... 最後未搵我地黎攪.

睇呢間公司都唔擺得好耐, 留多陣睇下囉. 反正佢地唔再限制我一定要做到幾時. 唔對路就閃囉. 化啦,做埋今次好人,睇下佢地想對我點囉: 學比利時公司果位叫 法蘭 士托文當年串我嘅名言: I have 2 hands only! How can I do so many things!

冇錯, 我會向佢學習. 雖然個名改咗做Asia.

星期6做完facial之後,收到通知要星期日晚出征台灣戰鬥至星期二. 頂! 我點讀書考試呀!!! 好在心急人話如果我肥佬會賠比我. 唔係我實又比信佢. 合格最好啦,我花咗好多時間由上水仆去港島返學架, 時間同心血係唔可以用錢計. 對住台灣果三位阿姐,肯定攪到我心力交瘁. 加上要跟下埋數, 仲點有時間/體力讀呢, 實賠硬比我啦.

預祝生日

今日終於頂唔順公司對我又一次的反覆冇情,又一次証明做好人冇好結果嘅定理. 我其實只要求較公平待遇啫,但就俾佢地睇死我只係睇錢份上,不斷附帶不平等條件想困死我係太平洋到年底. 好多錢咩, 我唔希罕喎. Offer 又唔係我提出, 家陣又出爾反爾. 叫我點信呀? 我心淡喇. 再加上成日勸我唔好辭職嘅阿媽, 琴晚竟然話公司既然咁對我,就唔好做啦... 嘩!! 感動~ing. 當時好想鍚佢一大啖.

今日放工前出咗封串串地嘅辭職信比心急人及人事部經理. 按咗個"send"字之後, 連日黎所有黑面, 惡劣心情通通消失晒. 雖然係冇咗我應得嘅回報, 但我唔介意. 豪比佢地囉,呢筆錢我絕會搵得返!

以下係我嘅辭職信,我講事實啫: 好串咩?

I hereby give you one month notice of my intention to leave my position as Senior Accountant-HK& PRC. (其實仲有台灣). Excluding my remaining annual leave, my last working date will be 27 June 2008.

I’m a professional accountant, I will try my best to handover information during this period even 太平洋 won’t give me any bonus for May.

Yours Sincerely

衰好心的我

Date: 28 May 2008

Last day當日係我生日(識做啦,朋友們! XD),為咗慶祝, 唔理正在減肥中,同瑪莉姐走去食pizza, 跟住預早買份生日禮物俾自己(見圖). 舒服晒!

多謝家嫂!

多得家嫂天生惡型惡相,實屬人間極品. 嚇到要黎交接嘅人唔敢過黎, 好野!! 令原本明天要搭9點機, 去負責保護咖哩及睇住人執屎嘅我, 可以唔使去見個死婆. 條氣都順番少少.

好在今日要返學,同唔到咖哩一齊出發, 唔係實比人圍剿, 咖哩到最後last week 終於做咗Asia 嘅職責, 學心急人話: 唔好成日為錢做野, 當比自己 一個學習嘅機會囉.

不過之後的屎會點呢, 好野! 心急人終於放手, 我唔會再理. 暫時只理艾力士果兩間較為正常嘅公司一陣咁多啦. 呵呵, 只要艾力士放過我嘅話, 我好快可以脫離苦海. Thanks God.

大家姐: 個死婆生到個樣咁, 係唔係神嘅安排呀! 等我可以唔使去執屎住.

講數

打咗十年工, 成日都做"順得人"老細叫我做咩我就做,當學吓野囉. 就係咁,老細以為你呢個傻婆,可以使得就使,次次都做到死死吓,攪到自己唔開心之餘,又傷身/心.

一早已經知會tata我會星期一正式通知唔撈, 但佢話唔理,等心急人攪掂佢. 其實大家呢排真係做到死死下. 所以我都盡量做,結果等了一個月又一個月. 公司全無起色, 前途不明,辛苦原來得個桔,仲要比人屈. 工作量同工資成反比. 唔想再等啦, 點知~~

心急人又要我下星期同咖喱去台灣, tata之前話唔使我去,結果唔係呢回事. 最終我同咖哩講咗本人星期一嘅大計. 佢叫我今日早d放工,等佢同心急人講數幫我抱不平喎.

家嫂果單野, 心急人話我太好人,所以先比人恰. 我都費事講, 我係為咗tata,唔想佢比人告.同埋何必為咗個少少錢,攪到比人告,到時律師費仲勁啦. 佢唔係負責人, 梗係唔會理.

心急人梗係唔想自己理我啦, 結果tata話清晨2點會打比我喎,我又唔係打劫, 千萬不要叫我開個價黎, 要咁做, 衰佬走果時我都可以做啦. 但我冇咁做喎. 錢只係其中一個問題, 我只想公司自覺咁有返d良知, 對我公平一點.

講數我唔識, 講價更冇誠意. 人工少d唔緊要,開心公平最重要. 今日比瑪莉姐同個保險朋友話我比人利用緊都唔知阿懵婆,唔關你事嘅野,做咩拿屎上身......咁人地叫我做喎, 講完跟住比佢地兩個輪流話我, "你攪到自己咁,抵你死架,死蠢!"~~~係咩?

喂, 俾下面好喎,我心情已經~~~~唉. 成4點啦,都未打黎,咁都好橫掂我已經無話可說......

心痛

當晚成12點先至返到屋企,老豆阿媽見到我個喊樣,我見到佢地個心痛樣,攪到我又再喊過.... 兩人輪流想盡辦法安慰我,比湯我飲,又拎豬肉干比我食,陪我睇電視,隻豬腳敏感咩,又幫我搽藥膏.其實當晚連晚餐都冇食,冇心情,只飲咗幾啖湯. 心情極度惡劣,指數高達100%

都係老豆了解我,只係叫我唔好再理呢間垃圾公司. 阿媽呢,反而叫我唔好唔做呀,出黎做野係咁架啦,下刪n個字. 我即刻火起,我話好在當初冇聽你講留係"屈銀紙",唔係點會有呢個人工? 都唔知點解,我次次都可以好快搵到工,都唔知佢驚咩. 就算屋企冇我比嘅家用,都唔會有影響喎,更何況我仲有能力比?

今日阿媽又講同一樣野,驚死我唔撈.激死,忍唔住好嬲咁叫佢收聲. 好在佢慣咗我嘅性格,冇野喎,仲好聽話咁收口tim.

睇黎佢呢幾日都會日日至少勸我一次,我有排煩囉.

心淡

你對人好,冇事果陣就當你朋友, 有時發生呢,就當你係衰人騙子,想害佢. 我真心想幫人,結果受傷是自己. 心淡喇!

我指台灣果三位阿姐,仲有心急人. 佢地所有恩怨關我鬼事,為咗少少野攪到咁為咗咩? 心急人同tata唔想同佢地講野,就推咗我出去受把. 家嫂第一句就話"關你什麼事,為何要我跟你講?" 喂, 我鬼知咩,人事上嘅事,我都唔知喎. 佢覺得我同佢唔同層次掛 (佢係經理,我係會計婆),但我人工不下於佢.講重要性,佢更加比唔上我.

佢d手下,平時同你好似好好,結果呢,又係話我呃佢. 我頂佢個肺, 我呢輪咁辛苦,又同佢地講好說話. 都係白費,再加上近日黑過墨汁,激到我係電話度喊咗出黎. 好喇,我最後都幫佢地fight到佢地的要求. 但我相信佢地一定唔覺得我有幫過佢地囉.

今次直頭比心急人put me on the table AGAIN! 佢就返屋企瞓,我就係公司比人激喊到十一點幾. 好在TATA趕咗返黎,唔理心急人指示. 做咗決定. 因我地都知一定唔會被炒囉. 呵呵...

我太嬲啦,冇先得到批准,就出個email 講我第二日要放假,話知佢. 班台灣三八,我唔會再理,要我去台灣. 等佢地走晒先啦, 我夠唔想同佢地講野咯.

由今年開始,成日都有大單野發生,諗住捱義氣幫得就幫,但直到今時今日,蝕底嘅係我. 心淡啦,唔想再拖,成日得個講字.

台灣豬腳

終於係台灣返黎,工作上都係滿佈屎,再講會口臭. 最頂住就係原本勸到M小姐心動留下幫忙,點知被人攪破壞,計劃衰咗,家陣可以用"亂七八糟"黎形容. 哈,睇黎又要去台灣 (如果我仲未走嘅話)

家陣冇名冇利,得個做字,係有好多消息傳出,咁又點? 同我講到天花龍鳳又有何用? 日日都有大鑊野發生,成日叫我等,等到幾時?

公司嘅屎同返學攪到我筋疲力竭,令我係台灣飯店度,穿拖鞋都可以"屈"親腳,天生扁平足的我,成日都發生,但次次都冇事,呢次我只係轉身走上床度,咁就仆係地上,痛咗5分鍾先可以起番身. 回港當日,好在有我姪仔幫我拎行李,唔使攞埋返學,唔使傷多幾成.

咁大個女第一次睇跌打,仲要連睇三次,咁有紀念嘅事,梗要同大家分享,現附上肥豬腳一大隻,供各位鑒賞:

"鬧" TV Part II

原本暫代瑪莉姐,迫佢第二日盡快比番個台我地睇,點知當日得阿媽一個,為有再約過. 呢次,出動佢地自己公司嘅工程師親自出馬. 得咗啦,幾經波折先睇到.... 各位,真係咁好又點會寫Part II 呢:

10/5: 唔知點解變咗用30MB之後,瑪莉部機係行快好多,但我就慢咗.令我抑鬱,不嬲都大細超嘅阿哥(我係佢最錫嘅妹,唔係瑪莉,呵呵),梗係即刻買過部無線上網嘅router 比我啦,熄機再開個死人PXXW 嘅broadband modem 之後竟然又上唔網及睇唔到"鬧" TV. 由於瑪莉姐最近打得多,已經記得個投訴熱線,點知得出黎嘅答案又係可能係機件問題. 又要聽日等人黎睇下.

都係我了解呢部機,佢同我呢排心情差唔多,日開夜開,做死人/modem咩. 部機一直擺係我度,只要我係度就會長期冷氣開放. 於是我開行冷氣比佢抖,開咗一個鍾度啦,又冇事啦. 第二日黑仔技工又晨早打黎,好人的我見冇事就叫佢唔使再黎啦.

11/5: 記住時間7點要睇惡作劇2吻嘅阿媽, 係下午我地睇"舞動奇蹟"時又死晒機喎,死啦又係咁,仲難服侍過我, 最衰自己又衰好心叫人唔好黎. 哈哈,我又從施故技,比佢自己涼下冷氣,令部modem復工,阿媽睇到惡作劇2吻,由第二節開始囉.攪到佢去今朝7點起身坐定定等重播.

其實當時怒火失控的瑪莉一早已打去技術支援問,點知又講冇辦法,今日冇得睇. 又話佢地modem 嘅QC好好,唔會over heat. 嘩!係唔係太好,縱壞咗要長期比冷氣佢呢..... 瑪莉姐唔想聽佢嘅廢話,叫佢轉去客戶服務部,條友居然死都唔肯轉! 話唔關果邊事喎. 咁都得,我地已經有個manager專門跟進,佢嘅直線電話都有啦. 又唔係要投訴佢,好啦, 唔轉比其他部門, 未叫佢轉比technical 佢地自己部門經理囉, 可能實在有太多投訴,令經理經驗豐富, 不但話會換過部modem,仲會搵佢地一個資深嘅自己嘅工程人員黎檢查.

12/5: 咩都換咗啦. 唔知捱得幾耐呢? 我家陣係台灣,佢冇冷氣享用喎. 頂得住嗎?

心情惡劣, 唔好理我

近排好煩, 樣樣都唔順意. 心情200%惡劣,見我黑面請見諒,我控制唔到.冇咩野事,唔好搵我.

工作:
好鬼多野做,全部係額外野, 公司週圍都有屎,自己負責個7 間都唔得閒理, 仲要理其他人果份. 平日我唔會介意, 但係影響到我其他私人事我就把鬼火! 下個星期去台灣做野.返黎果晚我我要拖埋電腦,喼同書去銅鑼灣返學,之後又拖返屋企,死得啦,都要行一大段路喎.加上公司前景不明,講明一定唔炒我,工作另有按排. 實冇錢賠,但遲遲唔講會點喎.咁想我點!

學業:
之前信心十足去報4科,諗住盡快呃返個牌返黎.(眼見好多有牌之人唔使做等出糧,有煩野就推比人,好後悔一直冇去考) 點知一報就鬼死咁多野煩,成日去對面海返學. 加上工作多咗,公司前景不明,心情受到影響,長期唔夠瞓,上次去台灣又攪到唔開心,眼見佢地唔使做又有錢賠,不知幾好. 已經冇時間精神同心情讀書,決定放棄2科考試,希望另外兩科可以一次過pass啦.

金錢:
之前果兩科考試報名費同買書錢,白白洗咗2千幾蚊. 書可以再用, 但考試費110英鎊就冇咗.我心情惡劣就好想買野發洩,上個月買耳環兩對,項鍊一條,冇啦啦又配眼鏡,唔計買衫錢及送禮物, 都洗咗6千蚊.仲有批命又比咗千二蚊

條命:
上星期又走去批命, 佢話我份份工都係要成日幫其他人做野, 叫我認命啦,咁會開心d喎. 我唔認架,點解份份工都係工作量,性質vs人工,職位都係成反比. 係唔係我好蝦d呀!

琴晚餐飯我都食唔落,成晚冇瞓,我已經set咗最後限期,下定決心絕對唔想會演"屈銀紙"時代嘅白痴事.

超低能 勁攪笑呀我!! (一週年)

平日細心精靈嘅我自舊年5月發生d 冇可能發生係我身上嘅白痴事之後. 一年後,今日又黎多單.

下午瑪莉姐約我去琛圳做彩甲,咩野都記得拎,人仔啦,回鄉咭,連SZ八達通都記得. 去到羅湖出埋個閘之後突然記起自己冇拎香港身份証, 我死啦!! 瑪莉姐等咗我半個幾月,係今日先得閒. 冇計啦, 為有又比20蚊搭去上水,睇下有冇得做. 途中我感受到佢嘅殺氣愈黎愈重,我即刻打比細T,點知呢位上水地膽都唔知.

好在即刻改變計劃,去sasa睇下有冇呢d野,不如買部機係屋企自己玩. 原來冇得賣,不過買咗一大堆同指甲有關嘅野. 有野買令瑪莉嘅殺氣成功消失, 嘻嘻! Thanks God!!

之後返到屋企先知有間美容院有彩甲服務,雖然比大陸貴成倍,但死心不息嘅佢都要做,兩個人又係美容院玩咗幾粒鍾. 不過都係大陸做得好睇好多喎.

PS: 想知道去年超低能勁攪笑第一回, 可去我舊blog look look: 標題都係呢個, 希望冇三週啦.

"鬧"TV

本人係一位TVB嘅忠實觀眾,見某收費電視出咗佢地嘅頻道, 係我多月游說下,瑪莉姐終於申請喇.我阿哥仲返黎幫我睇佢安裝. 點知:

29/4: 一位黑仔技工走黎安裝,攪咗成粒鍾都接駁唔到. 原來佢拎咗部壞機黎,無話可說.

~~當晚瑪莉姐的怒火指數係30%, 強度屬於低, 阿哥只有無奈.. 我梗係置身事外.

30/4: 黑仔技工再加個資深黑仔技工上黎攪過. 但係玩咗幾粒鍾結果都係攪唔掂. 根據資深黑仔嘅說法,係大厦機樓出問題. 佢地係外判,要成功安裝至有錢收,所以佢地仲急過我地喎,仲話會盡快跟進tim.

~~當晚瑪莉姐嘅怒火指數原本係50%,仲係安全範圍之內,之但係有兩隻不知死活嘅客戶服務員居然講埋晒d不知所謂嘅借口耍佢,令其怒火指數急升至80%,強度屬於高度危險. 瑪莉姐即刻發揮佢嘅專長: 串爆佢地,搵個高層次嘅人同佢對質,更迫令對方答應除咗要解釋原因之外,仲要係限期內發出道歉信比佢.

阿哥又白行一趟, 我依然置身事外

1/5: 黑仔哥哥實在太有心,朝早十點未到又黎裝過. 大佬,果日假期,個個仲瞓緊喎, 好在我一早約咗做facial,瑪莉姐嘅下床火加上原有怒火仲足以令黑仔哥們唔敢同佢講野. 阿哥於是又被急召返黎跟睇實她/他們.好在攪掂,仲睇咗成日.

~~瑪莉姐怒火立即回歸至30% 我地終於鬆口氣

2/5: 我想開黎睇,點知話我密碼錯誤. 我打比技術資援部問, 佢居然話冇我地account資料,呢次輪到我嘅怒火指數升至60% 成部機係樹,又裝咗咁多日,冇資料!!! 技術員感到我嘅殺氣,即叫我比次機會佢同我轉去customer service 跟進,等咗成10分鍾,客戶服務員話"唔知點解會咁". 我頂, 最憎聽到呢句, 舊年F姐又係講咗呢句,攪到我假期O.T(冇錢又冇假賠!!!) 我今次怒火指數升至90%, 鬧咗個位服務員2分鐘之後, 神奇地又話知點解喎, "機樓出現問題". 妖,忍唔住再丙咗佢一輪,跟住cut佢線.唔好當我lulu,如果係機樓問題, 點解我可以見到主畫面同上到網#@!#$%

好在我一直都係用我家姐名義同佢地講野,潑婦唔係我. 嘻嘻.

5/5: 又會見到黑仔哥黎喇,如果都未攪得掂, 唔知瑪莉姐會發惡到咩野程度呢? 期待ing~~

Mission Impossible

自從無辜被放入台灣呢個大鑊後,我就成為咗老細跟家嫂之間的代言人. 由於雙方各有道理,夾係中間的我真係煩到頭爆. 呢頭聽完家嫂對老細之不滿,轉頭又要講返家嫂的要求及現在公司情況比tata&心急人知道,有時仲要諗埋個解決方法比佢地. 有結果咩, 又要我同家嫂講. 原來我做咗電話呀, 大家不停咁比野我聽,以我呢個"死婆 冇鬼用" 嘅資質,講番原文80%已經好好(希望有啦,我估)

好啦, 跟埋台灣,人工冇變,職位冇變. 家陣香港大陸要跟7 間,台灣4間. 平日冇事就得啫, 家陣咁嘅時勢,同時期有鑊就死得啦我.

雖然心急人之前話知道我要考試上堂,冇多餘時間.會請CPA幫手喎. 但依家又話人地費用太貴,家陣要我出動我跟M小姐嘅友誼,叫我同佢溝通溝通,比公司解僱後又叫人番黎幫手喎(面子問題, 比我都唔會啦) 我點做談判專家呀!! 成功又會被家嫂認定我係二五女. 佢實誤會我啦.

原來五一勞動節真係要勞動架. 唔知要打幾多次IDD,人地先肯同我講吓野呢? 又一次比班日耳曼"膠層"玩死.
呢次真係做又死,唔做會慘死. 鬼叫自己要是做好人,捱義氣頂硬上. 留係度幫tata同唐寧咩.

澄清告示

早排抄咗篇"為你寫詩" 的感性歌詞,結果攪到比人問係唔係拍緊拖. 咩關事嘅咩! 唔比人鍾意聽情歌嘅咩? 我都鍾意聽快歌, 但我唔會郁身郁勢bor.


高風險嘅野唔好預我,係我所見的拖友/夫妻之中,平安冇事的少之又少. 唔想煩埋d咁高風險嘅事. 不如煩下去邊到旅行仲好啦.

唔好再問我喇, 我拍你個頭就會, 拍拖? 多謝喇,留番比公司果位極度希望有拖拍嘅美女啦..

台灣之痕-後續

上次講過係台灣搵到間好扺食嘅, 呢間係一問涮涮鍋連鎖店: 只須叫一份食物,免費送你一大碗菜,魚旦. 仲有幾款飲品,粉面, 鷄旦, 甜品, 雪糕任飲任食.
我只係叫咗份低脂牛肉(見圖), 其他都係送嘅, 埋單NTD290, 約HKD78. 掂! 台灣之行, 總算有些少安慰.

鐵人耐力賽

本人現正進行鐵人耐力賽,行程如下:

熱身賽: 台灣之行,受盡打擊,日日冇覺好瞓做餐你死,點知仲比人屈咗鋪勁野,平日同家嫂關係良好的我,都唔同我講野喇.

練習賽: 比人哦得多,一向毫冇上進心的我,近日再遇打擊. 有2個發鷄盲又係同公司嘅agent call 我見工, 咩都傾好晒,佢先睇到我唔係CPA.即刻改晒樣. 話再同我搵另一份喎... 哼, 有牌同做野係兩回事,我都見唔少啦.

係連番打擊下,心口諗住個勇字走去報名考試,仲一次報考4科. 2科自修,2科報讀精讀班,假日朝10晚9/朝10晚5. 平日有2晚就7至10. 全部係對面海上堂. 令我人生呢排充實到爆, 銀包空虛到爆 (使咗成萬蚊呀!). 全球合格率先得三十幾個百分比, 我簡直痴咗線喇! 又浪費金錢喇我.

日日係公司都係想知幾時執得,但近日又比我知道關於我嘅另一打擊,真係唔知點算,又要做人生的決擇,好死煩..

究竟我可以捱到幾時,我都唔知喎.不過以我嘅身形推斷,絕對頂得住!

為你寫詩

近排突然好感性, 覺得呢條歌超好聽:

Link:
http://www.youtube.com/watch?v=FVhZwTx2eL8&feature=related

為你寫詩曲詞唱：吳克群

愛情是一種怪事
我開始全身不受控制
愛情是一種本事
我開始連自己都不是
為你我做了太多的傻事
第一件就是為你寫詩

為你寫詩
為你靜止
為你做不可能的事
為你我學會彈琴寫詞
為你失去理智
為你寫詩
為你靜止
為你做不可能的事
為你彈奏所有情歌的句子
我忘了說 最美的是你的名字

愛情是一種怪事
你的笑容是唯一宗旨
愛情是一種本事

我在你心裡什麼位子
為你我做了太多的傻事
第一件就是為你寫詩為你寫詩
為你靜止
為你做不可能的事
為你我學會彈琴寫詞
為你失去理智為你寫詩
為你靜止
為你做不可能的事
為你彈奏所有情歌的句子
我忘了說 最美的是你的名字

為你寫詩
為你靜止
為你做不可能的事
為你 我學會彈琴寫詞
為你失去理智
為你寫詩
為你靜止
為你做不可能的事
為你彈奏所有情歌的句子
我忘了說 最美的是你的名字
我什麼都能忘記但唯一不忘是你的名字
我什麼都能忘記但唯一不忘是你的樣子
我什麼都能忘記但唯一不忘是你的名字
我什麼都能忘記但唯一不忘是你的樣子

冒牌劊子手

台灣之行, 目的係代家嫂埋台灣果幾盤數,做吓reports. 殊不知原來有高膠層下令當日公佈cut 人大計. 果班"膠層"真係不知所謂, 個個做晒縮頭烏龜,影都冇. 咁啱當日上午我有其他事搵個律師問野. 咁至死火喇!

就係下午,條律師走黎公司. 撻咗我名(原來佢只係contact過我一個人), 佢比咗份"舒特拉的名單"比我,叫我安排有關人等開會公佈詳情. 基於名單有我部門同事, 道義上陪埋一齊開會關心吓佢地. 就係咁, 家陣成個台灣公司以為我係心急人派黎嘅劊子手, 我回港後佢地要我交代詳情,又叫我返番去台灣. 再加上總公司有個死婆,居然話我係負責呢件事嘅人. 激得我出咗封投訴信比心急人, 講明我好disappointed & upset! 再主動call佢再去投訴! 我知心急人都係受害人, 但作為我老細,佢點都要做野!

我只一隻small potato, 呢個罪名我擔當唔起. 再去台灣,我怕比人丙喎!! 仲有, 唔該叫班不知所謂嘅人,唔知就唔好亂講野啦!!!!

返來囉

幸好家嫂好有heart咁提前返工,雖然一黎我就通知咗件事佢知, 見佢咁鬼激動,都唔知講咩野安慰嘅說話. 其實我真心想祝賀她可以早日脫苦海, 我地平日都想係咁啫, 但到真正發生嘅時候,情況會咁唔同喎.

好囉! 台灣終於有人跟番(雖然唔知會唔會再玩野), 唔理啦,即刻電聯心急人,死人都話唔使再到公司交接,可以係香港做都得, 就係咁我今日可以返到我嘅狗竇喇!

係台灣嘅最後一晚,居然比我搵到正野食, 不過家陣好鬼攰唔講住喇,下次再講.

台灣之癢 (二)

做死人咩. 星期日晚十二點返到台灣酒店,第二朝7點幾起身準備返工, 人地係香港係8黠半起身,9點幾至到公司ga ma.

今日由9點正一直做到6點 (冇去過厠所!) , 由於大家比今日嘅消息攪到無心工作, 個個準時閃人. 令我立即仆返酒店叫room service 食咗半個面之後一直做到一點多. 好倦呀我, 正值台灣多事之時, 心急人大把野叫我攪, 又要幫家嫂做野, 又要做大陸香港, n咁多野. 咩都係我. $#$%#

死啦, 第一日就咁, 仲有4日捱....幾時輪到我比人炒呀!! 我反肚喇....